Rev. Angus Stewart
Sa nangaging gulaa, atong gipaila-ila ang mga timailhan sa usa ka apostoles (Ikaduhang Corinto 12:12) ug atong gitala ang nagkadaiyang mga matang sa mga milagro (Mateo 10:8; Marcos 16:17–18). Apan unsa man kining mga milagro nga giangkon sa mga Pentecostal ug mga Charismatic sa atong panahon karon? Daghan kanila dili masuta, sama sa mga “pagpang-ayo” sa mga sakit sa bat-ang ug mga labad sa ulo o mga sakit nga gikan sa di’ maayong pangisip. Unsaon pagpamatuod nga ang usa ka tawo aduna gyud niining mga balatian, nga ang maong tawo wala nay sakit ug nga kini tungod sa usa ka milagro nga gihimo sa usa ka charismatic? Unsa man pod nang paghimo nila ug “malisod” nga mga milagro, sama sa pagbanhaw ug mga tawo gikan sa kamatayon, paghinlo sa mga sanglahon, pagpalakaw sa mga tawo’ng natawo nga pungkol, ug uban pa? Ang mga tinumo-tumo mahitungod niining mga butanga sa mga Pentecostal ug mga Charismatic talagsa ra, ug pipila ra ang makabarog kanila sa bisan gamay lang nga pagsusi.
Giasoy ni Victor Budgen kining makalingaw nga sugilanon sa usa ka panagtigom sa pagpang-ayo didto sa London: “tungatunga sa panagtipon sa Albert Hall ang chairman (alimpay) mipahibalo nga may usa ka tawo sa kongregasyon nga nasakit ug anaa karon sulod sa St. John nga ambulansya, ug kon adunay may doktor sa palibot palihug adtoa ang maong tawo sa madaling panahon” (The Charismatics and the Word of God, p. 100). Asa ang pagsalig sa chairman ug sa mga nanambong diha sa gahom sa pagpang-ayo sa mga pangulo sa charismatic? Nganong kinahanglan pa man nilang magpakitabang sa mga medico?
Ang mga milagro sa Ikaduhang Corinto 12:12 lunlon tinuod ug di’malalis, sanglit ang maong mga milagro kinahanglang anaa aron pagpahimug-at sa buot ipahayag ni Pablo. Ang apostol naghimo’g pagkadaghan nga mga milagro nga nakahagit sa katingala niadtong nakakita kanila ug nagtudlo ngadto sa kamatuoran sa ebanghelyo nga iyang giwali: si Hesu Cristo gilansang sa krus ug nabanhaw alang sa mga makasasala! Gawas pa sa mga pakisayran sa mga milagro nga gihimo ni Pablo sa balasahon sa Mga Buhat ug sa Ikaduhang Corinto 12:12, ang apostol naghisgot usab sa iyang mga milagro didto sa Galacia sa kauyokang Turkey (Galacia 3:5), ug bisan gikan sa Herusalem ngadto sa amihanang bahin ug sa kasadpang bahin ngato sa Illyricum, kapin kun kulang ang kanhi Yugoslavia (Romans 15:19).
Ang mga paganong kasupak, dili-magtotoo nga mga Judio ug mini nga mga apostoles ganahan gyud unta nga makalimod sa mga katingalahang gipamuhat ni Pablo. Apan, sama sa mga milagro ni Cristo (Juan 11:47), ingon man ni Pedro ug Juan (Mga Buhat 4:14–16), ang mga gamhanang pagpamuhat ni Pablo dili masupak.
Matikdi, una, nga gipang-ayo sa mga apostoles ang katawhan sa hingpit. Ang baldado nga si Aeneas gilaygay sulod sa walo ka tuig. Gibalita ni Pedro kaniya, “Giayo ka ni Hesu Cristo,” ug siya mibangon ug gihipos ang iyang higdaanan (Mga Buhat 9:32–35). Wala lamang nagpakita sa Aeneas ug kalamboan o pag-uswag. Inay, nakabaton siya’g di’kapugngang gahom diha sa iyang mga kasway.
Ikaduha, giayo sa mga apostoles ang katawhan sa diha-diha dayon, sama sa bakol sa Mga Buhat 3. Wala na nagkinahanglan pa ug bisan unsang terapiya o usa ka proseso sa kabangunan.
Ikatulo, giayo sa mga apostoles ang tanan nga midangop kanila aron magpaayo (sama pananglitan, Mga Buhat 5:12–16). Wala nila mistil gisulayan pag-ayo sa usa ka tawo apan napakyas, unya ibasol kin isa masakiton: “Dili igo ang imong pagsalig!” Lahi ra gayud sa mga gikaingong tambalan sa atong kapanahonan karon!
Human sa kapin usa ka siglo sa Pentecostalismo (apil ang Charismaticism ug ang Neo-charismatisicm), asa na man ang ilang di’ikalimod nga mga milagro? Daghan sa mga masakiton ang nangaayo kuno apan diay nagpabiling masakiton. Ang uban natanggong sa daghang mga panagtigom sa pagpang-ayo aron pagpangitag kaayohan apan dili man gani makalitok nga nakadawat sila’g kaayohan. Daghan nang nangagi nga mga pagpanglimbong ug pagbutyag sa maong pagpanglimbong. Nagsige na lang ug kadaot ang pangalan ni Crisot atubangan sa kalibotan tungod niining mga limbongan apan bisan pa niana mailad gihapon ang mga tawong ilaronon.
Layo ra kaayo kon itandi kang apostol Pablo! “Sa pagkatinuod ang mga timailhan sa usa ka apostoles nagpamuhat sa inyong taliwala sa tuamng pailob, diha sa mga timailhan, ug mga katingalahan, ug sa gamhanang mga buhat” (Ikaduahng Corinto 12:12). Gisultihan ni Pablo ang mga taga-Corinto, ingon nga sangpotanan, “Inyong nakita ang gahom sa Diyos, ug nahibulong sa mga milagro nga nagpamuhat sa akong mga kamot. Kini mga timailhan sa akoang apostolicanhong katungdanan – kamo mismo mga nakasaksi ug dili kini ninyo ikalimod.” Sa laing bahin, ang pakaaron-ingnon nga mga milagro ug kulang nga mga kaayohan maoy mga timailhan sa usa ka tigpakaaron-ingnon, usa ka mini nga magtutudlo nga adunay mini nga ebanghelyo, kasagaran himoong gatasan ang katawhan.
Usa ka charismatic naghulagway unsaon pagtino kon ang usa ka tawo “Natandog sa Kaayohan.” “Kasagaran imong bation ang hilabihang kainit sa tibuok mong lawas. Unya human sa pipila ka mga minute, ang kadaghanan ilang mabati ang talagsaon ug engkantohanong kalinaw gikan kang GINOONG Hesu Cristo. Imong mabantayan kanus-a ‘ni mahitabo, talagsaon kaayo kini nga bation. Sama kini ug langit dinhi sa yuta. Imong mabantayan inigkahitabo niini ug wala kay pagduda. Makabalo ka nga ang Balaang Espiritu ni Hesu Cristo ang nagahikap kanimo … Usahay mabati nimo una ang huyuhoy sa hangin. Tinuod lagi!!! Sama ra sa tinuod nga huyuhoy sa hangin o usa ka hinay nga alimpuyo, bisan pa’g sirado ang tibuok lawak. Usahay imong bation ang daw init nga habol sa enerhiya nga naputos sa tibuok mong lawas. Kon mahitabo kini, sama kin isa engkantohanong sanina. Mura kini’g hingpit nga bahin sa imong pagkatawo. Usahay makatimaho ka’g langitnong hasmin o uban pang katingalahang mga alimyon. Imong mailhan nga kining baho langitnon ug balaan sa dihang magparamdam kini sa kahingpitan sa Balaang Espiritu. Kon imo man ugaling matimahoan kining katingalahang mga alimyon, imong nasinati ang usa ka dugang pinasahi nga duaw gikan kang GINOONG Hesus. Makaseguro ka sa dihang imong matimahoan kining mga butanga.”
Unsa may angay buhaton niining tanang di’-biblicanhong kabuang? Aduna bay susama niini sa tibuok nga sagradong Kasulatan? Inyo bang nabantayan unsa ka sagad maghisgot ang tagsulat sa kon unsay kasagarang “bation” (ikaunom ka higayon sulod sa parapo sa ibabaw) – ang pagbati sa kainit o kalinaw o ang huyuhoy sa hangin o ang habol o hingpit pagkahaom nga mga sanina – o “mga baho” (ikaupat nga higayon) – langitnong hasmin o laing katingalahang alimyon? (Ang Romano Catholicong mga mistico kasagarang naghisgot sa gikaingong langitnong mga pagduaw sa susamang pagkasulti.) malatngonon, nga wala man gani maghisgot nga nasayod ka nga naayo ka sa dihang naayo ka! Mga pinalangga, ang tinuod nga timailhan sa usa ka biblicanhong apostoles mao ang tinuod nga kaayohan nga walay bisan unsang pagarpar sama sa gihulagway milabay nga parapo, ingon sa gitudlo sa Ikaduhang Corinto 12:12 ug sa Bag-ong Tipan!
