Rev. Angus Stewart
Ang napulo’g duha ka mga apostoles ug si apostol Pablo nagbaton ug pagpanudlong kagahom sa mga pastor, dugang pa niini ang di’ masayop nga pagpanudlo nga kagahom, lakip (alang sa pipila kanila) sa kagahom sa pagsulat nga linamdagan ingon ug kanonikanhong Bag-ong Tipan nga Kasulatan.
Kini nga mga apostoles nagbaton usab ug pagmandong kagahom sa mga anciano. Sama kanila, ang mga apostoles adunay kagahom sa pagpanton, mamati ug mudesisyon ug mga kontrobersiya, ingon man sa pag-ordena sa mga nagdala’g katungdanan. Sahi sa mga anciano, ang mga apostoles adunay kagahom pagdumala sa mga ebanghelista niadtong unang siglo ug makabaton usab ug kagahom paghukom sa napulo’g duha ka banay sa Israel sa kataposang adlaw (Mateo 19:28).
Dugang pa, ang mga apostoles nagbaton ug kagahon pagpakita’g kaluoy sama sa mga Diacono. Ang napulo’g duha namuhat sa bulohaton sa mga Diacono sa kapanahunan sa uanng Bag-ong Tipan nga iglesya hangtod sa Buhat 6. Si apostol Pablo maoy kanhi nanguna’ng indibidwal sa paghatod ug panalapianong hinabang gikan sa mga Griyegong kaiglesyahanan ngadto sa mga kabos nga magtotoo sa Herusalem (Unang Corinto 16:1 – 4; Ikaduhang Corinto 8 – 9).
Sa laktod, gihiusa sa mga apostoles diha sa ilang kaugalingon ang mga katungdanan sa pastor, anciano ug Diacono, ug gani nagbaton ug mas dakong kagamhan kay sa gitipon nga tulo ka pinasahi ug malungtarong mga katungdanan. Dugang pa, ilang malukpanong gihuptan kini nga kagamhan, kay ang tanang mga kaiglesyahanan nailalom sa kagamhan sa mga apostoles. Kanyahay si apostol Pablo makasulat, “Kay bisa’g morag angay akong mangandak sa among kagamhan, nga gihatag kanamo sa GINOO alang sa paglig-on, ug dili alang sa inyong kalaglagan, dili ako angay nga maulaw” (Ikaduhang Corinto 10:8).
Kini nga kagamhan naggumikan ug nagapangalagad. Kay lagi, ang mga apostoles nailalom sa pagka-GINOO ni Hesu Cristo, ang bugtong hari ug pangulo sa Iglesya, ug sila, sama kanato, nailalom sa kamatuoran sa Iyang Pulong.
Sa pagpakiglambisog ni Pablo sa mga mini nga apostoles sa Ikaduhang Corinto 10 ngadto sa 13, makaingon ka nga ang capitulo 10 naghisgot sa apostolikanhong kagamhan, ang capitulo 11 sa apostolikanhong mga pagsakit, ang capitulo 12 sa apostolikanhong mga pagpadayag ug ang capitulo 13 sa apostolikanhong pagpanton. Ingon man sa mga apostolikanhong panan-awon, ang supernaturalismo sa Ikaduhang Corinto 12 naglakip sa mga apostolikanhong milagro: “Sa tinuoray ang mga timailhan sa usa ka apostoles nagpanglihok taliwala ninyo sa tanang pailob, sa mga timailhan, ug mga katingalahan, ug sa gamhanang mga buhat” (12). Matikdi ang kalambigitan dinhi tali sa mga apostoles ug mga milagro!
Ang matuod nga apostolikanhong katungdanan hustong gilambigit sa mga milagro nga buhat sa Espirito niadtong panahon sa mga apostoles, ingon nga kini natala sa Bag-ong Tipan. Sa laing bahin, gilambigit sa mga nagkandiyang mini nga kaiglesyahanan ang ilang (bakak) mga milagro sa ilang (peke) mga apostoles.
Hunahunaa, una, ang Romanhong iglesya. Ang santo papa kunohay maoy manununod ni apostol Pedro ug ang iglesya sa santo papa nag-angkon nga usa sila ka milagrosong iglesya – gikan pa sa nangagi, hangtod sa kasamtangan ug sa umalabot.
Ikaduha, kini nga kasiglabotan dayag, sa Mormon. Ania ang ika-unom ug ika-pito sa “Mga Artikulo sa The Church of Jesus Christ of Latter-Day Saints (Iglesya ni Hesu Cristo sa mga Santos sa Ulahing mga Adlaw)” ni Joseph Smith: “Nagatuo kita sa samang kapunongan nga naglungtad panahon sa Karaang Iglesya, nga mao, ang mga apostoles, mga propeta, mga pastor, mga magtutudlo, mga ebanghelista, ug uban pa.” “Nagatuo kita sa gasa sa nagkalainlaing pinulongan, propesiya, pagpadayag, mga panan-awon, pagpang-ayo, paghubad sa nagkalainlaing pinulongan, ug uban pa.” “Ang mga apostoles” (6) ug ang mga milagro sa “pagpang-ayo” (7) suod nga nalambigit.
Moadto kita, sa ikatulo, ngadto sa Catholic Apostolic Church (Iglesya Katoliko Apostoliko) nga nalambigit kang, ug gisugdan ni, Edward Irving (1792 – 1834) sa London. Ang mga milagro nga ilang giangkon migiya kanila nga ibalik ang katungdanan sa apostoles. Sama sa mga Mormon, ang Catholic Apostolic Church nahiluna usab sa napulo’g duha nga gidaghanon sa ilang mga apostoles, kansang ang gikaingon nga kataposang apostoles mitaliwan niadtong 1901.
Ikaupat, daghang karismatikong mga pundok nag-angkon pagbaton sa mga milagro ug mga apostoles, samtang ang ubang mga partido nga naga-angkon pagbaton sa gahom paghimog mga milagro abli sa alinghuna nga adunay mga apostoles sa kasamtangan.
Ang Ikaduhang Corinto 12:12, nga gikutlo sa wala pa madugay, naggamit ug tulo ka mahinungdanong mga pulong alang sa tinuod nga mga milagro: “mga timailhan,” “mga katingalahan” ug “gamhanang mga buhat.” Isip “gamhanang mga buhat,” ang mga milagro maoy ugbayong mga buhat nga ginama pinaagi sa talagsaon nga langitnong gahom. Isip “mga katingalahan,” ang mga milagro maoy mga katingalad-an nga makapapukaw ug kahingangha, ang sugpayong salangpotan diha sa mga tawo. Isip “mga timailhan,” ang mga milagro maoy mga igtutudlo nga nagtion sa dakong espirituhanong kamatuod: nga mao ang katubsanan diha sa dugo ni Hesu Cristo ug ang kaluwasan nga hikaplagan Kaniya lamang, matod sa di’ masayop nga pagpanudlo sa Iyang pinasahi nga langitnong sinugo.
Kining mga milagro o “mga timailhan,” “mga katingalahan” ug “gamhanang mga buhat” nagkadaiya ang mga matang. Upat niini natala sa tahas ni Cristo ngadto sa napulo’g duha ka mga tinun-an sa Mateo 10:8: “[1] Ayoha ang masakiton, [2] hinloa ang mga sanglahon, [3] banhawa ang patay, [4] hinginli ang mga demonyo.”
Kini ang saad sa gibanhaw nga GINOONG Hesus sa Marcos 16:17 – 18: “kini nga mga timailhan magsunod kanila nga nagatoo; Sa akong Ngalan [1] ilang hinginlan ang mga demonyo; [2] magsulti sila’g bag-ong mga pinulongan; [3] ilang kuptan ang mga bitin; ug [4] kon moinom sila ug bisan unsang makamatay nga butang, dili kini makadaot kanila; [5] ilang itap-on ang ilang mga kamot sa masakiton, ug maulian sila.”
“Sila nga nagatoo” (17) mao ang napulo’g usa ka mga tinun-an kansang, liwas sa pagkayab sa GINOO ngadto sa langit (19), “nanglakaw, ug nagsangyaw sa tanang dapit, ang GINOO nagapanglihok kanila, ug gipamatud-an ang pulong inubanan sa nagsunod nga mga timailhan” (20).
Niining lima ka “mga timailhan,” ang pagpanulti’g “bag-ong mga pinulongan” – mga pinulongan nga “bag-o” sa tigpamulong ug wala makat-onan sa yano nga mga pamaagi – dili talagsaon alang sa mga apostoles o bisan sa ubang talagsaon ug lumalabay nga tighupot sa katungdanan: nga mao ang mga propeta ug mga ebanghelista.
Duha sa laing “mga timailhan” gihisgutan sa Mateo 10:18 ug sa Marcos 16:17 – 18. Kini nagbilin kanato sa unom ka mga matang sa mga milagro gikan niining duha ka mga tudling sa Bag-ong Tipan: [1] pagpang-ayo sa masakiton, [2] paghinlo sa mga sanglahon, [3] pagbanhaw sa patay, [4] paghingilin sa mga demonyo, [5] pagka-kublan sa lala sa bitin ug [6] pagka-kublan sa mga hilo.
Apan daghan pa ang angay masulti mahitungod sa kinaiyahan ug sa mga nagapamuhat niining mga timailhan!
