Brian Crossett
Unsay labing kasagarang pakisusi nga ikapangutana sa usa ka Baptist ngadto sa usa ka Paedobaptist (kadtong nagatoo nga ang mga kabataan sa mga magtotoo angay’ng bunyagan)?
Lagmit mao kini, “Ipakita kanako asa sa Bag-ong Tipan diin gibunyagan ang usa ka masuso.” Ang tubag mao ang Unang Korinto 10:1-2: “Dugang pa, mga kaigsoonan, dili ko itugot nga magpabilin kamong walay alamag, kon giunsa nga ang atong mga katigulangan nagpanaw ilalom sa panganod, ug ang tanan milabang sa dagat; ug ang tanan nabunyagan nga pinangulohan ni Moises diha sa panganod ug diha sa dagat.”
Apan ang tubag sa usa ka Baptist mao nga wala mahisgoti ang mga masuso sa maong pasahe. Itugot ko nga wala gayud mahisgoti ang mga masuso sa kadaghang mga pulong. Apan, binuang isipon nga ang kaliwatan sa Israel nga mokabat ug 600,000 nga kalalakin-an (Numeros 1:46) nga nagpanuigon ug “kaduhaan pataas” nga “makaasdang sa panggubatan” (Numeros 1:3) walay masuso nga anak.
Unya motubag na usab ang mga Baptist, “apan ang bunyag dili kagawian sa Daang Tipan; kagawian lamang kini sa Bag-ong Tipan.” Ang atong tubag mao nga gitawag kini nga bunyag sa Bag-ong Tipan bisan tuod nahitabo kini sa Daang Tipan.
Ang ilang tubag mao nga ang bunyag sa Israel sa Daang Tipan usa ka hulagway sa bunyag sa Bag-ong Tipan. Ang atong tubag mao nga, “Sigue, aduna bay mga masuso sa maong paghulagway?”
Apan moingon sila nga ang mga kaanakan sa Israel walay kalibotan sa ilang bunyag didto sa Dagat nga Mapula. Motubag kita nga, “Oo, ang tanang mga masuso walay kalibotan sa ilang bunyag, bisan ang linghod pa nga Iglesya.”
Niining puntoha, mahimong mosibag ang Baptist. “Ang bunyag angay lamang ipadapat agig pagpaunlod,” ang iya unyang ikasulti. Diin atong tubagon, “Apan kon ang mga kabataan sa Israel gipaunlod, nangamatay unta sila kuyog sa Paraon ug sa iyang kasundalohan. Ang Paraon ug ang iyang kasundalohan naunlod apan wala nabunyagan; ang mga kaanakan sa Israel nabunyagan apan wala nangaunlod. Sa pagkatinuod, ang ilang bunyag nakasandig sa ilang pagka-wala-maunlod. Busa, ang bunyag ug ang pagpaunlod duha ka managlahing mga butang.”
Managsamang pangatarongan ang barogan mahitungod kang Noe ug sa iyang panimalay panahon sa lunop (Unang Pedro 3:20-21). Kung ang pagpaunlod adunay katuyoan, ang maong katuyoan dili ang murepresentar sa kaluwasan apan sa kalaglagan. Kini gipakita pinaagi sa pagpaunlod sa gilaglag nga mga kasundalohan sa Paraon, ang paglaglag sa daotang kalibotan diha sa lunop ug ang kataposang paglaglag sa impiyernohonon pinaagi sa pagpaunlod kanila sa lawa sa kalayo.
