Ronald Hanko
Daghan sa mga denominasyon karon ang nagadawat ug babaye ngadto sa mga katungdanan sa simbahan sa pagka-pastor, pagka-ansyano ug pagka-diakono. Ilang ginaangkon nga niining paagiha lamang pagailhon ang mga gasa nga gihatag sa Diyos sa kababayen-an, ug mao nga niining paagiha lamang nga mahatagan ug katarongan ang biblikanhong panudlo nga ang tanan patas diha ni Kristo (Galacia 3:28).
Kini ba nga mga pag-angkon husto? Gihikaw ba sa iglesya ang katungod sa mga kababayen-an paggamit sa ilang hinatag nga gasa sa Diyos kung kini naghikaw kanila sa katungod pagsilbi sa mga katungdanan sa iglesya? Angay bang ordenahan ingon nga mga pastora, ansyano ug mga diakonesa ang mga kababayen-an? Unsa man ang ginasulti sa Biblia?
Ang panudlo sa Biblia niini nga hilisgotan ingon katin-aw. Ang mga kababayen-an dili angay mangalagad sa mga katungdanan sa iglesya. Ang Unang Timoteo 2:12 nag-ingon, “Dili nako tugotan ang babaye nga motudlo o sapawan ang awtoridad sa lalake; angay siyang magpakahilom.” Ang Unang Korinto 14:34 nagtudlo sa samang butang: “Ang mga kababayen-an angay nga magpakahilom sa kasimbahanan. Wala sila gitugotan nga mosulti, apan kinahanglan
nga magpailalom, sumala sa patakaran.”
Kini lagi nga mga bersikulo wala nagpasabot, nga dili na lang gayud mosulti ang usa ka babaye sulod sa simbahan, apan dili sila makasulti ingon nga pastor, sama sa pagtudlo o pagdala sa silimbahon. Dili silay angay mosulti pinaagi sa pastoral nga pag-ampo, pagwali, pagpatin-aw, pag-awhag ni pagtudlo ingon sa gipahayag sa Unang Korinto 14.
Kining tanan gikompirma diha sa Unang Timoteo 3 ug Tito 1, diin naghisgot sa mga ansyano (obispo) ug mga diakono isip mga bana. Busa, ang pag-ordina sa kababayen-an, nagsupak sa yano nga panudlo sa Kasulatan.
Ang bugtong paagi paglikay sa mga panudlo sa Kasulatan niining butanga mao ang paglimod sa Kasulatan ingon nga linamdagan ug di-masayop nga Pulong sa Diyos. Maoy hinungdan nga ang mga kaiglesyahanan nga naga-ordena sa kababayen-an naga-ingon nga ang mga pasahe nga kinutlo mga pulong lamang ni Pablo nga gipanaminan ang kultura diin siya nabuhi o usa kuno ni sa mabaw nga pagtan-aw sa kababayen-an. Kung ang Kasulatan maoy Pulong sa Diyos, nan kining mga bersikuloha dili hunahuna ni Pablo kondili hunahuna ug pagbulot-an sa Diyos! Naga-ingon ang Diyos, “Pahiloma ang inyong mga kababayen-an sulod sa kasimbahanan!”
Apan unsa naman lang ang mga gasa nga gihatag sa Diyos sa ubang mga kababayen-an? Dili ba tinuod nga adunay mga kababayen-an nga mas adunay ikasarang itandi sa daghang mga kalalakin-an aron pagbuhat sa bulohaton sa nagkandaiyang mga katungdanan sa iglesya? Angay natong masabtan nga ang gikalantugian dili kon gihatagan ba sa Diyos ug gasa ang mga kababayen-an. Nihatag man gayud Siya. Ang gikalantugian dili kon ang mga kababayen-an angay gamiton ang ilang mga gasa nga gikan sa Diyos. Angay man gayud kini nilang gamiton. Ang bugtong gikalantugian mao nga kon asa nila angay gamiton ang ilang mga gasa. Ang Balaang Espiritu nga maoy naghatag kanila sa maong mga gasa nagdili kanila paggamit sa ilang mga gasa diha sa mga katungdanan sa iglesya.
Apan nagpasabot ba kini nga wala na lang gayud bahin ang mga kababayen-an sulod sa iglesya? Dili! Adunay mahinongdanon kaayo nga dapit ug pagka-tinawag ang mga kababayen-an sulod sa iglesya. Naghisgot niini ang Bibliya diha sa Unang Timoteo 2:15, 5:9-14, ug sa Tito 2:3-5. Aduna silay katungdanan gikan sa Diyos diha sa simbahan nga dili matuman ni bisan kinsa nga lalake.
Nan, unsa may atong hunahunaon, sa mga simbahan nga nagatugot pag-ordina sa kababayen-an? Ang maong simbahan nagalimod sa maong awtoridad sa Pulong sa Diyos ug nagmasinupakon sa maong Pulong. Angay silang maghinulsol kay kon dili moanha sa ilaha si Kristo ug pagakuhaon ang kandelero gikan sa nahimutangan niini (Pinadayag 2:5) aron dili na kini modan-ag sa Kahayag sa himaya sa Diyos ingon nga tigpamatuod ngadto sa kalibotan. Ug sa ingon kadtong kabahin niini magpabilin sa kangitngit ug dili sa Kahayag.
