ДЕНЬ ГОСПОДЕНЬ ПЕРВЫЙ
Вопрос 1й. Что есть едино твое утешение в животе и во смерти?
Толк. Елико душею равно и телом аще ли поживу, аще ли умру, не мой, но вернаго Спаса моего Иисуса Христа есмь собинный. Иже многоценною кровию Своею за вся грехи моя до конца заплащь, мене от всякоя власти диаволя освободи. И мене тако хранит, яко без воли Отца моего небеснаго даже власа с моея главы не может упасти; воистину же, даже всим ко спасению моему служити достоит. Темже мене такожде Своим Духом Святым о животе вечнем надеждна творит и, яко Самому впредь да живу, усердна и уготована обращает.
Вопрос 2й. Колико суть тебе еже знати потребных, яко да сим утешением наслаждаяся, блажено поживеши и умреши?
Толк. Три. Первое, елико будет греха моего и нищеты моея величество; второе, яцем образом от всякого греха и нищеты свобождуся; третие, яку благодать Богови за сие освобождение должен буду.
ДЕНЬ ГОСПОДЕНЬ ВТОРЫЙ
– Часть Первая- О Человечи Нищете-
Вопрос 3. Откуду твою нищету знаеши?
Толк. Из закона Божия.
Вопрос 4. Чесо от нас требует закон Божий?
Толк. Сему учит ны Христос кратце (Мат. 22:37-40): “[Да] возлюбиши Господа Бога твоего всем сердцем твоим и всею душею твоею, и всею мыслию твоею, и всею силою твоею. Сия есть первая и большая заповедь; вторая же подобна ей: [да] возлюбиши искренняго твоего яко сам себе. В сию обою заповедию весь закон и пророци висят.”
Вопрос 5. Еда сия вся совершено хранити можеши?
Толк. Никакоже; естеством бо склонен есмь к ненавидению Бога и ближняго [моего].
ДЕНЬ ГОСПОДЕНЬ ТРЕТИЙ
Вопрос 6. Еда убо Бог человека тако повреждена и превращена созда?
Толк. Ни[какоже]. Поистине, блага и по образу Своему [Бог] созда его, сиречь: истинною правдою и святостию наделена, яко да Бога Творца своего право знает, от душы любит, с Ним блажен во век живет во еже Его восхваляти и прославляти.
Вопрос 7. Откуду же есть сие естества человеческаго повреждение?
Толк. От падения и непослушания прародителю [нашею] Адама и Евы [в Раи]; сего ради естество наше таково есть повреждено, яко вси во гресех зачинаемся и раждаемся.
Вопрос 8. Не воистину ли до того растлени есмы, яко во еже добре деяти ничтоже есмы потребни, ко всякому же развращению наклонни.
Толк. Воистину [есмы]; аще Духом Божиим не возродимся.
ДЕНЬ ГОСПОДЕНЬ ЧЕТВЕРТЫЙ
Вопрос 9. Ни ли убо Бог человеку неправду творит, егда от него в законе требует яже [той] исполнити не может?
Толк. Ни; зане Бог человека такова созда яко та исполняти может; человек же, наущьшему диаволу, и своею самого непокоривостью, себе и весь наследок [свой] божественых тех даров лиши.
Вопрос 10. Еда Бог сию непокоривость и крамолу отпущает непокарану?
Толк. Ни[какоже]; но страшны образы прогневляется яко за врожденыя нам грехи, тако и за ты яже сами сотваряем; тыя же праведном судом времянами и вечнами казньми карает якоже Сам возвещает: “Проклят всяк человек, иже не пребудет во всех словесех закона сего, еже творити я”.
Вопрос 11. Ни ли убо Бог такожде есть милосерд?
Толк. Есть Бог комуждо милосерд, тако же яко такожде есть праведен; темже требует Его правда, еже противу вышьшему Божию величию совершаемо есть, то и яко вышьшими, то есть вечнами, душевнами и телеснами казньми да карается.
ДЕНЬ ГОСПОДЕНЬ ПЯТЫЙ
– Часть Вторая- О Избавлении Человечи-
Вопрос 12. Егда убо, праведным Божиим судом, времянам и вечнам казнем повинны есмы, есть ли избыточен кий совет или путь имже сих казний избавимся и Бога умилосердим?
Толк. Хощет Бог Своей правде возблаготворене быти; сего ради требе есть, чрес нас ли чрез иного ли, да возблаготваряем.
Вопрос 13. Можем ли сами мы возблаготворити?
Толк. Никакоже; яко еще долг по вся дни умножаем.
Вопрос 14. Может ли кая тварий [кде обретена], яже толь же тварь есть, за нас возблаготворити?
Толк. Никаяже; зане, первое, не хощет Бог еже человек согреши, сие на коей иной твари взыскати; другое, и не может кто иже ничтоже аще тварь есть, прогневление Божие на грех под’яти, и ины от него избавити.
Вопрос15. Каков убо взыскаем есть [ны] ходатай и избавитель?
Толк. Иже истинный кто человек есть, и совершено праведен ; и же всих тварий сильней; то есть, иже купно такожде есть истинный Бог.
ДЕНЬ ГОСПОДЕНЬ ШЕСТЫЙ
Вопрос 16. Вскую потребно есть ему истинну человеку и еще же и совершено праведну быти?
Толк. Зане правда Божия требует яко то же естество человеческое еже согреши, само за грех да заплатит; иже бо сам грешник есть за ины платити не может.
Вопрос 17. Вскую подобает ему купно такожде истинно Бог быти?
Толк. Яко силою Своего божества бремя гнева божественаго естеством Своим под’яти, нам же правду и живот возвратити и восставити, да возможет.
Вопрос 18. Кто обаче есть сей Ходатай иже купно есть и воистину Бог и истинен и праведен человек?
Толк. Господь наш Иисус Христос, иже сотворен есть нам премудрость от Бога, правда, освящение, и искупление.
Вопрос 19. Откуду сие веси?
Толк. От [святаго] благовестия, еже Бог [Сам] преди в Раи откры; и послежде чрес патриарх и пророк проповеда, жертвами и прочы обычаи законными прообрази; последи же чрез Сына Своего единороднаго исполни.
ДЕНЬ ГОСПОДЕНЬ СЕДЬМЫЙ
Вопрос 20. Еда убо всим человеком, иже во Адаме погибоша, чрес Христа спасение возвращается?
Толк. Ни; воистину, тем точию, елици истинною верою сами прицепятся и [вся] его благодеяния приимут.
Вопрос 21. Что есть [истинная] вера?
Толк. [Истинная вера] есть не точию [некое] ведение, имьже твердо соизволяю всим яже Бог во Словеси Своем откры, но такожде дерзостное упование, Духом Святым чрез благовестие в сердци моем возжизаемо, яко не точию инем, но и мне, отпущение грех, вечная правда и спасение даруема суть, [и сие же] вольно, по Божии милости, за единого Христа достояние.
Вопрос 22. Что же суть тая в няже потребно есть человеку Христиану веровати?
Толк. Вся, яже нам во благовестии обетоваются, ихже изложение в символе истинны и несомнены нашея Христианския веры кратко содержится.
Вопрос 23. Что есть сей символ?
Толк.
“1. Верую в Бога, Отца, Всемогущаго, Творца небесе и земли;
2. И во Иисуса Христа, Сына Его единороднаго, Господа нашего;
3. Иже зачат есть Духом Святым, рожден от Марии Девы;
4. Страдав при Понтии Пилате; распят, умер, и погребен; сниде во преисподняя;
5. Третиим днем воскресе из мертвых;
6. Взыде на небеса, седит одесную Бога Отца Всемогущаго;
7. Оттуду приидет еже судити живыя и мертвыя.
8. Верую в Духа Святаго.
9. [Верую во] святу церковь соборную; святых приобщение;
10. Оставление грех;
11. Плоти воскресение;
12. И живот вечный. Аминь.”
ДЕНЬ ГОСПОДЕНЬ ОСЬМЫЙ
Вопрос 24. На колико частий разделяется сей символ?
Толк. На три части: первая есть о [Бозе] Отци и нашем сотворении; вторая есть о [Бозе] Сыну и нашем искуплении; третия есть о [Бозе] Дусе Святем и нашем освящении.
Вопрос 25. Егда едина есть точию сущность божественая, вскую три сия именуеши: Отца, Сына и Духа Святаго?
Толк. Зане Бог тако Себе во Своем Словеси откры, яко три сия разныя ипостаси суть един той же истинен и вечный Бог.
ДЕНЬ ГОСПОДЕНЬ ДЕВЯТЫЙ
– О [Бозе] Отци-
Вопрос 26. Чему веруеши егда глаголеши “Верую в Бога Отца, Всемогущаго, Творца небесе и земли”?
Толк. Верую [яко] вечному Отцу Господа нашего Иисуса Христа (иже небо и землю, со всими яже в нею суть, из ничесоже созда; и иже та вечным Своим советом и провидением держит и строит), о Христе [Сыну Его], Богу моему и Отцу моему быти; темже тако на Нь надеюся, яко не усомнюся яко уготовит вся души ли телеси ли моему потребныя; яко даже, яже мне злая, в сем болезнивем житии, низпосылает, тая к моему благу обратит; егда и творити сие может, яко Всемогий Бог, и творити сие хощет, яко достоверен Отец.
ДЕНЬ ГОСПОДЕНЬ ДЕСЯТЫЙ
Вопрос 27. Что разумееши под провидением Божиим?
Толк. Всемогущю и весьде сущую Божию силу, еюже небо и землю со всими тварьми, якоже рукою, держит и строит; яко зелие и злак, дождь и же бездождие, многоплодие и неплодие, ядь и питие, доброе и худое сдравие, богатство и убожество, и же вся прочая, не прилучаемь, но отчею Его рукою бывают.
Вопрос 28. Что ны пользует сие сведение яко Бог вся сотворил есть и провидением Своим досели держит?
Толк. Яко в тесноте терпеливи, во обилии благодарствени да будем; на будущее же первое на [нашего] Бога вернейшаго и Отца упование возлагаемо да имамы, яко ничемуже быти еже нас от Его любве отлучит; понеже вся твари тако суть во Его руце, яко без Его произволения даже двигнутися не могут.
ДЕНЬ ГОСПОДЕНЬ ПЕРВЫЙ НА ДЕСЯТЕ
– О [Бозе] Сыну –
Вопрос 29. Вскую Сын Божий нарицается Иисус, то есть, Спас?
Толк. Зане ны спасает [и избавляет] от всих грех наших; и никакогоже спасения от’инуду [нам] искати есть должно, ниже инде обрести есть мощно.
Вопрос 30. Веруют ли убо тии во единого Спаса Иисуса, иже от святых, или от себе, или от’инуду благополучия или спасения ищут?
Толк. Ни; аще бо словом же Имь и похваляются, делом самем обаче отрицают единого Спаса [и избавителя] Иисуса; потребно бо есть, ово Иисусу не быти совершену Спасу, ово иже Его, Спаса, истинною верою приемлют, тем вся в Нем обретати яже ко спасению требуются.
ДЕНЬ ГОСПОДЕНЬ ВТОРЫЙ НА ДЕСЯТЕ
Вопрос 31. Вскую нарицается Христос, то есть, помазаник?
Толк. Зане от Отца поставлен, и Духом Святым помазан, да будет Вышьшей Пророк и Учитель, иже нам тайный совет и всю волю Божию о искуплении открыл есть; и Вышьшей Архиерей, иже нас единою жертвою Своего телесе искупил есть, и усердно о нас у Отца молится; и [вечный] Царь, иже нас Своим Словом и Духом строит, и стяжаным нам спасением охраняет и сохраняет.
Вопрос 32. Вскую же ты Христиан нарицаешися?
Толк. Зане чрез веру уд есмь Иисуса Христа, и помазания Его причастник; яко имя Его да исповедую, мене же да принесу Ему живую благодарствия просфору; и в сем житии сопротив греха и диавола свободною и доброю совестию да биюся, и послежде вечное с Ним царствие во всих тварех да держу.
