Rev. Angus Stewart
Ang mga panudlo suno sa ginhatag paagi sa balaan nga mga Kasulatan amo ang kinahanglanon naton para sa sakto nga paghangop nahanungod sang coronavirus pandemic. Ang Kristohanon nga pagtamod ang makahatag sang mayo nga paghangop nahanungod sa COVID-19, kag makahatag sa aton sang kasulhayan kag kalinong sa Ginoong Hesus sa sini nga mga magamo nga tion. Sa ini nga malip-ot nga artikulo, aton makita kung paano ang coronavirus nagahisanto sa anom ka mga pangulo nga pagtoloohan sang Biblia (nga may gamay nga pagbag-o sa pagkasunod-sunod): 1) Diyos, 2) Tawo, 3) Kristo, 4) sa katapusan sang mga inadlaw, 5) Ang Iglesia, 6) Kaluwasan. Gani indi matublag o malingkang!
(1) Dios. Ang matuod kag buhi nga Dios wala sang dulunan, wala sang ginsugodan kag wala sang katapusan, kag wala nakabag-o sa Iya nga kaalam, gahom, gugma, katotom, pagkabalaan kag Iya nga hustisya. Kag sa sina, ang Dios nga Labing Mataas amo ang nagaisahanon nga Manunuga, tagapangulo sa bug-os nga kalibutan kag mataas nga Hukom. Siya amo ang bug-os nga Soberano, subong ang Nagaisahanon nga “Ang tanan nga mga butang natuman suno sa ginplano kag ginpat-od sang Dios” (Efeso 1:11) –kaupod dira ang coronavirus – kay “wala sing may may makapamatok sang iya kabubot-on ukon makausisa sang Iya ginahimo” (Daniel 4:35).
(2) Tawo. Indi parehas sa mga anghel, ang katawhan may ara sang pisikal nga lawas, upod na da ang baga, nga amo ang ginahalitan sang COVID19. Indi parehas sang mga kasapatan, ang tawo naga angkon sang espiritu kag indi nagakadula sa kamatayon parehas sa isa ka ido (Manugwali 12:7), batok sa patupato sang ebolusyonismo kaupod sang iya nga kabutigan nga nagahatag sang indi matuod nga paglugpay sa kadam-an.
Paagi sa pagkahulog sa sala ni Adan, ang aton nga pangulo nga tiglawas, ang bug-os nga katawhan, magluwas kay Kristo, ginpanamkon kag ginbun-ag sa sala, kag bug-os sa kalautan pinaagi sa natural nga kinaugali (Roma 3:10-18; 5:12-21). Bilang isa ka rational kag moral nga tinuga, ang tawo may ara sang konsensya (Roma 2:15), nakahibalo sang malain kag maayo, kag may ara sang pagkahadlok sa kamatayon kag balaan nga paghukom (Hebreo 2:15). Amo ini nga kabangdanan ngaa madamo nga di-tumuluo ang na hadlok sa sining kalalat-an.
(3) Kristo. Bilang Anak sang Dios kag Anak sang Tawo, ang aton nga Ginoong Hesus is a ka bug-os nga Diyos kag tawo. Pinaagi sa Iya nga tampad nga pagsunod sa kabuhi nga wala sing dagta sang sala kag pinaagi sa Iya kamatayon para sa aton mga sala, ang aton nga Manluluwas amo ang “Ginoo sang mga patay kag buhi” (Roma 14:9). Ang ginlansang kag ang nabanhaw nga Kristo subong nagapungko sa trono sa langit, nagapatuman sang walay katapusan nga kasuguan nga gintangdo sang Dios kag pagdumala sa bug-os nga butang sa Iya nga gin-aman paagi sa bugay.
Siya ang Kordero nga, sa Iya nga pagkabayaw, nagbaton sang libro halin sa kamot sang Dios nga Trinidad kag nagbukas sang pito ka selyo, kaupod sina among ang ikaapat nga selyo nga may yara sing maluspad nga kabayo (Bugna 5-6). Kag ang nagasakay sini, ang Kamatayon, nakapatuhoy sa apat ka makakulugmat nga paagi sa pag patay sang katawhan: giyera, gutom, mapintas nga mga sapat kag kalalat-an, kaupod dira ang coronavirus (Bugna 6:8; cf. Ezequiel 14:21).
(4) Ulihing Panag-on. Ang Ginoong Hesus naghatag sang pila ka mga sinyales sa Iya nga pagbalik sa Mateo 24:7: “[a] ang isa ka pungsod makasalakay sa isa ka pungsod, ang isa ka ginharian magagubat sa isa ka ginharian: kag may magaabot nga [b] gutom, kag [c] kalalat-an, kag [d] paglinog, sa biskan diin nga duog” (cf. Lucas 21:10-11). Ang kalalat-an sang COVID-19 ay matuod nga “yara sa nagkalain-lain nga mga lugar,” parehas sa Tsina, Italya, Espanya, USA, Alemanya, S. Korea kag, sa pagkamatuod, halos sa bilog nga mga kapungsuran.
Ini nga pangkabilogan nga mga kapipit-an indi lang nagapahayag sang balaan nga Dios sang langit nga naga silot sa mga makasasala nga tawo diri sa kalibutan, pero sila man ang mga palatandaan sang pagkari liwat ni Kristo kag sang pinakaulihi nga paghukom. Kapila mag hatag sang promisa ang aton Ginoong Hesus sa libro sang Bugna, “Sa matuod Ako magaabot sang gilayon! Amo ini ang aton nagkaisahanon nga “bulahan nga paglaum” (Tito 2:13).
(5) Iglesia. Ang pinakamaathag nga epekto sang coronavirus sa Iglesia amo ang pagkatublag sini. Ang pagpanimbahon sa adlaw sang Domingo, ang klase parte sa katekismo, pagtulun-an sang Biblia, kag madamo pa gid, nga kung indi gin kansela, nabuhinan sa bilog nga kalibutan. Sa guwa sang isa ka panimalay, may yara gamay o wala na gid sang pag-updanay sa tunga sang mga tumuluo sa pamaagi sang pisikal nga pag-updanay o pagtilipon. Ang Kristohanon nga mga Sacramento sang Bawtismo kag Pahinapon sang Ginoo gin paiway.
Imbis nga magkadto sa Adlaw sang Ginoo nga magpanimbahon, madamo ang nagakinahanglanon mag gamit sang CDs ukon DVDs ukon audio cassettes ukon mga libro. Ang iban maka-angot paagi sa on-line nga mga mensahe ukon live webcasting. Subong, ang CPRC live streams, paagi sa video ukon audio, pangamuyo kag sa pagbasa kag pagpahayag sang Pulong halin sa amon simbahan kag sa amo man nangin amon regular nga pagpanimbahon sa adlaw sang Domingo: 11 am kag 6 pm (https://cprc.co.uk/live-streaming). Nagapaabot kami sang adlaw nga makakanta sang Psalmo 122:1 sing ulopdanay: “ Ako nagakalipay sang sila magsiling sa akon, Lakat ta sa puluy-an sang Ginoo.” Pero subong, kita magpatunga paagi sa pagpangamuyo sa isa kag isa kag maghiliupod sa isa kag isa pinaagi sa telepono ukon on-line.
(6) Kaluwasan. Nahanungod sa pag-aplikar sa aton sang aton nga kahilwayan kay Kristo, ini ang bugay nga puro kag sigurado, suno sa wala nagabag-o nga kabobot-on sang Dios, kay “ang Iya ginpain, sila man Iya gintawag: kag ang Iya gin tawag, sila man Iya ginpakamatarong: kag ang Iya ginpakamatarong, sila man Iya ginhatagan sang himaya” (Roma 8:30)!
Gani ano ang ginahimo ni Jehovah sa Iya pinili, nagpasag-uli kag ginbag-o nga katawhan paagi sa coronavirus? Ang balaan nga tinutuyo kag ang resulta sang Iya mga pinilipi sa sini nga kabuhi – biskan pa subong! – amo man sa gihapon halin sang una pa kag mangin sa palaaboton: nga manginkaangay kita “sa imahe sang Iya nga Anak, akod nga Siya ang manginpanganay sang mga madamo nga mga kautoran” (Roma 8:29)!
Papaano ginahimo sang aton Amay nga sa langit sa sini nga pandemic, kung ang pagpahayag sang Pulong kag ang mga Sacramento sa (pisikal) pagtililipon sa mga tumuluo kag sang ila mga kabataan para sa pangpubliko nga pagsimba sa adlaw sang Ginoo gindingutan sa aton sing temporaryo? (Sa sini nga mga inadlaw sang COVID-19,Psalmo 42, 43, 63, 84, 137, kag madamo pa, ang mas makasulubo.)
Sa aton madumdoman madamo nga mga paagi nga ginagamit sang Dios sa mga tinion parehas sini: pagpangamuyo sang dayon (ikaw bala nagapangluya sa imo pagtuo?), sa pagpabasa sang balaan nga Kasulatan (basi imo gakalipatan ang Pulong?), ang pagtuon sang Reformed nga mga libro (kung sa diin basi wala ka na sang oras nga para magpadugay pa), kag madamo pa. Si Jehovah, sa Iya bugay, magagamit sini nga mga espirituhanon nga mga pamaagi, may kaangtanan sa aton subong nga mga pagtilaw, kay “nakahibalo kita nga tanan nga bagay ginahimo sang Dios para sa kaayohan sa ila nga nagahigugma sa Iya, sila nga gintawag suno sa Iya tinutoyo” (Roma 8:28)!
Gani indi kita magkabalaka nahanungod sa palaabuton, kundi magsalig kita sa aton maloloy-on nga Amay sa langit (Mateo 6:24-34; Filipos 4:6-8), nga magagamit sa sini nga kalalat-an, subong sang Iya pag-gamit sang dako nga tiggulutom, para sa kaluwasan kag nagapadayon nga kaayohan sang Iya mga katawhan (Genesis 50:2).
Para sa dugang nga balasahon sa Hiligaynon, palihog etum-ok lang diri.
